"Lo Guarracino"

Song on "tarantella" rhitm



Lo guarracino ghieva pe mmare
Ghieva trattanno de se nzorare,
Se facette no bello vestito
De scarde de spine pulito pulito,
Co na perucca tutta ‘ncrifata
De ziarella ‘mbrasciolata
Co lo sciabo’ scolla e puzini
De punto d’angrese fine fine.

Cu li cazune de rezze de funno
Scarpe, e cazette de pelle de tunno,
E sciammeria, e sciammerino
D’aleche e pile de voje marino,
Co buttune, e buttunera
D’uocchie de purpe, secce, e fera,
Fibbia, spata, e sciocche ‘nnorate
De niro de secce, e fele d’achiate.

La Sardella a lo barcone
Steva sonanno lo calascione;
E a suone de trumbetta
Ghieva cantanno st’arietta
"E tare’ lo mare e lena
"E la figlia de sia Lena
"Ha lassato lo ‘nnammurato
"Pecche’ niente l’ha rialato.

Lo Guarracino ‘nninch’ a guardaje;
De la Sardella se ‘nnammoraje;
Se ne ghiette da na Vavosa
La cchiu’ becchia maleziosa;
L’ebbe bona rialata
Pe’ mannarle la ‘mmasciata:
La Vavosa pisse pisse
Chiatto, e ttunno nce lo ddisse.

La Sardella ‘nnincho sentette
Rossa rossa se facette,
Pe lo scuorno che se pigliaje
Sotto a no scoglio se ‘mpezzaje;
Ma la vecchia de vava Alosa
Subbeto disse, ah schefenzosa!
De sta manera non truove partito
‘Ncanna te resta lo marito;
Ma la Patella che steva de posta
La chiammaje facciatosta
Tradetora, sbrevognata
Senza parola, malenata,
Ch’avea ‘nchiantato l’Alletterato
Primmo, e antico ‘nnammorato;
De carrera da chillo ghiette
E ogni cosa lle decette.

Tu me lieve la nnammorata
E pigliatella sta mazziata;
Tuffete, e taffete a meliune
Le deve paccare, e secozzune,
Schiaffe, ponie, e perepesse
Scoppulune, fecozze, e conesse,
Scerevecchiune, e sicutennosse
E l’ammacca ossa, e pilosse.

Patre, figlie, marite, e mogliere
S’azzuffajene comme a fere
A meliune correvano, a strisce
De sto partito, e de chillo li pisce.
Che bediste de Sarde, e d’Alose
De Palaje, e Raje petrose
Sareche, Dientece, e Achiate,
Scurme, Tunne, e Alletterate,

Muorze, e pizzeche a beliune
A delluvio li secozzune
Non ve dico che bivo fuoco
Se faceva pe ogne luoco
Te’, te’, te’ cca’ pistolate,
Ta’, ta’, ta’ la’ scopettate
Tu’, tu’, tu’ cca’ li pistune
Bu’, bu’, bu’ la’ li cannune.

Ma de canta’ so gia’ stracquato,
E me manca mo lo sciato,
Sicche’ dateme licenza
Graziosa e bella audienza,
‘Nfi che sorchio na meza de seje
Co salute de luje e leje,
Ca se secca lo cannarone
Sbacantannose lo premmone.